Колку пари врти „СИЛБО“ од буреци, леб и пецива?

Најбрзорастечкиот скопски бренд за бурек, пецива и леб „СИЛБО“ е сопственост на две фирми кои ги имаат двајца браќа од Стајковци: Силјан и Боби Милеви. Лани под брендот „СИЛБО“ двете фирми имале вкупно приходи кои надминуваат 3,3 милиони евра.

Еден од најпознатите и најбрзо растечки скопски брендови за леб, бурек, пецива „СИЛБО“ лани преку своите две фирми свртел вкупно 3,35 милиони евра, покажуваат официјалните податоци достапни во базата на Централниот регистар.

Еден од најпознатите скопски брендови кој секојдневно храни илјадници скопјани всушност е сопственост на две фирми, сопственост на двајца браќа од скопски Стајковци. Асоцијацијата на брендот „СИЛБО“ всушност се првите слогови од имињата на браќата Силјан и Боби Милеви.

 

Секој од двајцата браќа поседува по една фирма. Силјан е сопственик и управител на „Жито Скопје Силбо ДООЕЛ“ постарата од двете фирми која е формирана 2.10.2008 година. Основачкиот влог е 320.000 денари, а на крајот на 2017 година оваа компанија има главнина и резерви во вредност од 926.000 евра. Во споредба со 2016 нивната вредност лани пораснала за повеќе од 120.000 евра. Оваа фирма лани вработувала 80 лица, а нејзиниот вкупен приход е 2,26 милиони евра и во споредба со истиот во 2016 година е помал за околу 300.000 евра. Фирмата на Силјан лани имала добивка од 132.700 евра, а во 2016 година нејзината добивка изнесувала 329.300 евра. Оваа фирма има две подружници од кои едната е прославената бурекџилница во Дебар Маало со назив Фурна СИЛБО, а втората е со исто име и со додава ТЦ Бисер во скопската општина Аеродром.

Помладиот брат „Жито Клас СИЛБО“ е основана на 25 март 2009 година и е во целосна сопственост на другиот брат Боби Милев. Нејзината дејност е посредување со трговија со храна, пијалоци и тутун. Таа има една подружница која се вика Пекара Жито Клас СИЛБО и е со седиште во Горно Лисиче. Приоритетна дејност и е трговија со леб, печива…. И оваа фирма е основана со влог од 320.000 денари, а на крај на 2017 година вредноста на нејзината главнина и резерви изнесува 191.000 евра и е приближно иста со вредноста на нејзините резерви една година порано.

Лани оваа фирма вработувала 60 лица, а нивниот број во однос на 2016 година е зголемен за 46 луѓе. Вкупните приходи на „Жито Клас СИЛБО“ лани се 1,088 милиони евра и во споредба со 2016 година тие растат за безмалку 30 отсто. Со исто темпо растеле и расходите и така фирмата лани завршила со добивка од 2.400 евра.